معرفش ليه سرحانه فيه...؟
... ما عرفش ليه باقلقْ عليه
مع إنِّي عارفه انِّي حبيبتـُه ورُوحي فيه
وانِّي كمان مُتأكِّده من حُبُه ليـَّا وحُبِّي ليه
مع إنِّي لسَّهْ مكلّماه باكتب ماسيج: يا حبيبي إنت وَحَشتِني
وفي اللحظه دي... توصلني منُه رساله برضو زيَّها
تليفوني أصلاً مُش بيلحقْ يتْقِفِلْ
تليفوني مِنّي بيستجيرْ
الشـَّحن يخلصْ كُل ساعَهْ
وباشحِنـُه في اليوم كِتيرْ
والكهربا لو تقطع اتعفرتْ قوي
الفِيشَه تستغرَبْ عليـَّا
تقوللي معقول...؟ طَبْ في ايه..؟؟
فأقول لها: مشغوله دايمًا أسألـُه، واعرف بيعمِل إيه،
وفينْ..؟؟
مينْ اللي كان بيكلمُه...؟
ورسالة ايه دي اللي بيكتبها بقى اااااا..؟
ولحد غيري وللا ايه...؟
مين دَه اللي ياخُد منُه ثانيه غيري انا...؟
مين دَه اللي يقدرْ يحتويه، ويخاف عليه زيِّي أنا..؟
دانا لو بيتنفـِّس وبَسّ
أعرفْ حالاتـُه، ومُودُه، واعرَفْ عندُه إيه
واقدر كمان بسهوله احدِّدْ موقِعـُه
دُخـَّانْ سيجارتُه يعدِّي أسلاكْ الاتصالْ
واستنشَقـُه
وبسُرعَه أطلبْ نمرتـُه
أيون.. ألوووه
واطلبْ كمان..
فيقول: ألوووو.... ويقول: فيه إيه..؟
وقوام قوام أضحك
واقول : معلش يا حبيبي أنا
اعذر حبيبتك أصل انا مجنونه بيكْ
ومِن جِناني بخافْ عليكْ
فبلاش بقى تخلّيني دايمًا ماشيه بالقلقْ الكِبيرْ
أحسَنْ وعهدَ الله ما اسيبك لحظه تتلفـِّتْ ورَاك،
أخدَك واحُطـَّكْ بين رموشي
واقفل الجفنين عليكْ،
لا تروح شِمال
.. ولا حتى تقدر تتجِّه ناحية يمينْ
خلّيني ساكته وعاقله أحسن اجنـِّنـَكْ
وبسُرعه يلا...
قوللي مين يعني اللي كان بيكلـِّمكْ..؟
ما هو لو ما قـُلتش تبقى ناوي ع النّكَدْ
إنطقْ بقـَى
إنطقْ بسُرعه احسن وديني أنُط لكْ
أركب وأجيلَكْ
وف ثواني هتلاقيني بين إيديك
لا يهمِّني طول الطريق ولا زَحْمِتـُه
ولا شيء هيمنعني كمانْ
مع إن بُكرَه الامتحانْ
ده الاقتصاد والفلسَفَه صَعبين قوي
ومفروض اذاكرْ
ما عرفش ليه باقلق عليكْ خالصْ كِدَه
يلا بقـَى .... وبسُرعه قول:
مين اللي كان على التليفون بيكلـّمكْ...............؟
:
:
وطني الكبير اللي احتواني وباحتويه...........
معرفش ليه باقلق عليه.......؟
ليست هناك تعليقات:
إرسال تعليق
يهمنا النقد البناء والرأي العام
أضف تعلقيك / لكن تذكر أن يديك سوف تتحاسب يوم القيامة